ونتصالح معاها ازاي؟

نبوس راسها..نجيبلها ورد ؟

 نكلمها كلمتين علي جنب ونقنعها اننا ممكن نعّدلها؟ تطاوعنا ولا نبدلها ... 

كلام كتير مربوط بخيط أبيض حرير بخاف لو الخيط انقطع يطير ... تبان كده الحماقات علي الملأ وننكشف والكلام مننا يندلق ... 

صحيح ماهي الحماقات كده ...دي قله عقل ...

بدل ما تراضي وتدادي تحدف طوب ويجي كلام مالوش لازمة وبالمقلوب..

وتلقي الازمة فجأة بقت اسلوب .

كتير ارجع لنفسي واقول ده ايه العقل ده ..مش معقول ..

وتيجي فلحظة نفسي بنفسها وكأنها ولا تعرف تفك الخط حتي في يوم!

مابين عاقل وبين مجنون تلاقيني..

وليه لازم نغير نفسنا وكأننا مش قابلين ...

وايه المانع اننا نقبلها كده علي شاكلتين ..ونقدر بيها ناخد خطوتين سهلين؟

 صحيح العقل حلو لكن هما فين الي من الجنون سالمين!

ساعات مطلوب نبسطها ..نعديها عشان نعرف نخططها ...

ايوه الحياة انا اقصد عليها كلامي

 بحماقتها وحكمتها الي جت قدامي ...ناخدها كده علي بعض ونعيشها ..

نراجع نفسنا ايوه ..لكن منكسرهاش مفيش ايام نعيش فيها تكون ببلاش ..

كل ما كانت خطوتك ثابته تعيش مرتاح ولو كانت مخطية بغباوة ساعات ..

فكر وقول هاعديها واكون قد الي بعديها..واحسن من الي فات

متمسكش للحياة مسطرة تقيس بيها مقاس العقل جنب كل المسخرة ..

طبيعي هي دنيتنا لازم تكون كده ..انا بعد السنين بقيت متأكدة ...

ان الحماقة حته من كل عقل انت وشطارتك ياتخليها قطة بنونوه تعدي ..

ياتخليها غول ..ياكل خَضار العقل والحكمة ..

متستسلمش.

صالح حياتك حبها بحلوها وبمرها ... 

خليك شديد زيها وقدها ..دي نصيحتي ليك انا عشتها 

وفضلت انا وحماقاتي وشطارتي حته منها ..وبحبها ...

حبها

كتبته

دعاء سليط 
just_me_didi