ام نيازي ست تشوفها تقول بسيطة علي قد الحال بيتها في شارع جانبي يقع في منطقة شعبية البيوت متقاربة والظروف متقاربة... الكل بيجري علي لقمة العيش... هواية ام نيازي انها تطلع البلكون الصغير المستخبي من واجهه البيت وتتابع الناس فالشارع مع فنجال القهوة الي علي سبرتاية وتسمع احوال الناس مين اتجوزت مين اتطلقت وشويه من فضايح الخلق ابن الست نعيمة وقصه حبه مع بنت الحج سيد والواد ابن ام يس الي جاب توكتوك وبيقولوا انه ساعات بيأجرة للعيال الحراميه يلطشوا الشنط والموبايلات ويجروا.
الصور كتير والاسرار كتير اهم حاجه ان ام نيازي مبتتكلمش ساكته تسمع وتسكت وكل ما تتزنق في خدمة طرف حد منهم لو عصلج توشوش ودانه وتقوله بلوي من بلاوية_تهديد يعني_ قوم يخاف ويكش وعلي طول التنفيذ يحل محل الرفض
المعلم ضبش طبعا كلنا عارفينه صاحب الكباريه الي ع الناصية والكل عارف شغلته ايه سوا مع الراقصات او في مصلحة الهجامين ،بين ضبش وام نيازي مصالح كتير كل واحد مداري علي مصالح التاني خصوصا لما اتفقوا يسرقوا بيت المحروسة لما سافرت شارم الشيخ
ضبش يجهز رجالته ويقّلب البيت وهي تاخد الكردان الدهب الي كانت منشنه علية والكرسي الهزاز الي كانت عينها هاتطلع عليه كل ماتشوفه م البلكون
وسط زحمة يوم كان سوق التلات كل ستات الشارع وشبابها بيدوروا علي رزقهم وحياتهم اتفقوا يتداروا فالزحمة ضبش يدخل ومحدش هاياخد باله وهي تاخد الكردان والكرسي من سكات مكنتش متوقعه ان الكرسي يخلق مشكله؟؟ ضبش عجبه الكرسي قوي ومسك فيه اداها الكردان وشوية هدوم ومسك الكرسي وقالك ده بتاعي...
ام نيازي اتجننت ياراجل ده انا جبتك علشان اخد الكرسي اقعد وانجعص عليه واتهز تطمع كمان فوق اللي سرقتو؟؟
رجاله ضبش كتير الوليه تقول انا عاوزه الكرسي وهو رجالته يقولولها لا مالكيش فيه ده بتاع المعلم ضبش
اخد ضبش الكرسي حطه فالكباريه ولا هموا وبقي يمارس عليه كل مهامه ومنها تظبيط شغل المزز كل يوم سبويه حلوه واللعبه بتحلو
رجعت من السفر المحروسة لقت ضبش سرق البيت وكمان أجرة للجيران الست قعدت تعيط تعيط انا عاوزه البيت بتاعي ماليش غيره لمت العيال الي فالشارع وراحت علي الكباريه قالت حقي برقبتي ضريوا ضبش واخدت الكرسي الهزار وطلعوا علي بيتها طردوا الي قاعدين عافيه وحطولها الكرسي الهزاز مكانه وسابوها ترتاح.
ضبش بقي صدق ان الكرسي بتاعه والوليه ام نيازي مستنياله ع غلطه تفضحه راحت قالت له يا تديني الكبارية يا هافضح الي خلفوك، اتجنن ضبش قالك عليا وعلي اعدائي ووقف يزعق وسط الناس وقالهم الوليه دي بتتصنت عليكم يابشر الست دي مالهاش مصلحة الا بلاويكم.
يام نيازي قولي للناس كلها ان ضبش حرامي بس انا كمان هاقولهم انك بتتصنتي ع العيال وهاقولهم كمان انك دايره توقعي الخلق في بعضها هاقول كتير يام نيازي هاقول ع الدعارة والامارة والسلاح ...هاقول ع السرقة ومشيخه المنصر هاقول ع الرقاصين والي بيطبلولهم وهاقول عالبجاحة والتناحة والعماله
اخرة الرقص حنجلة يام نيازي
واه ياضبش
1/11/2013
No comments:
Post a Comment