فطاطري الحرية

تقول الرواية ان الرجل الغلبان كان جعان وعطشان نزل الميدان مع الطوفان يدور علي لقمة ليه ولولادة ...قالوله حرية قول ورانا مستني ايه مكنش عارف يعني ايه ولا تطلع بكام ولا قد ايه بس حس انه بيعمل الي عليه

خلصت الشغلانه واتفض الميدان ولسه الرجل الغلبان جعان؟ نعمل ايه في الولاد يارب العباد حد شار عليه وقال تعالي اشغلك عندي تاكل وتسترزق واهو كله بما يرضي الله.

يوم ما راح يستلم لقي المحل اسمه فطاطري الحرية ...طيب انا مبعرفش اعمل فطير ؟ ايه الحوسة دي يا ربي ومن زميل في العمل النصيحه اتقدمت متخفش كلنا هنا من غير امل ولا حد فينا بيفهم في الفطير بس ادينا علي باب الكريم لقمه وهدمة للولاد وبكره يمكن نشوف الحرير .

ومش غريبة علي غلبان داير حزين وجعان انه يقبل بشغلانه لافيها بيفهم ولا عارف لها اصل من فصل دكانه..المهم ان الولاد تاكل وتتغطي وتلبس حتي العلام بالصدفة يجي مفيش مانع ..ميجيش ولا تفرق

فتحوا المحل وقالوا نعمل فطير كل واحد من الغلابه قال وماله نتعلم كله بدا يجرب ازاي الفطير يتعجن مره يزيد الدقيق ومره يزيد اللبن ومره يحطوا الميه ... ايش حال الفطيرة تطلع من الفرن؟

اول فطيرة يا عزيزي خرجت كما الصخر تخبطها في الحيط ترد من القهر لانافعه في اكلها ولا نافعه حتي للقطط تنحط

الغلابه كتير الكل نفسه يعمل فطير ويبيع ويكسب ياكل ويلبس الحرير ...جالهم كبير المحل وقال الحكاية مهياش موال العجين يتعجن وفي والفرن يتولي الي جاي متقلقوش الطريقة بسيطة ....اعملوا عجين الفلاحة

الكل واقف يفكر هو الفطير ايه علاقتة بالفلاحة ؟ قال الغلبان لصاحبه يابني كله اصل واحد العجين عجين سوا كان فطير ولا عجين الفلاحه والفطاطري ميفرقش وياه احنا نعمل ايه هو الي فارق مكسبه فجيبه يساوي قد ايه والخساير نشيلها احنا ماحنا الي معكوكين في العجين والباقي ليه.

الخلاصة..العجين محتاج ايدين عارفاله توزن الموازين وتعرف مقادير الفطير وتعرف صنعته وخبزته بدل الفطير ما يطلع كرواسون مايعرفوش الغلابة ولا حيلتهم يشتروه شفتوا العجين حتي لو واحد ممكن تطلع فطير وممكن بيه تعمل جاتوه.

النهاية لازم الغلبان ده ياكل والولاد تتعشي وتلبس ولا حد يمس قوت الغلابه ولايقلب  موازينهم والمفاجأة النهاردة الي نزل الميدان غلبان يواجه عسكري مفتري شادد حيلة زمان , النهاردة واقف حامي ظهر المفتري علشان انت يالهمام لا سبت له فرصة  يعجن عجين ولاعلمته كيف يكون ولا سبت غيرك يعلمه ويفهمه لاخدمته ياكل عيش ولا جبتله رغيف ولاقلتله ان الفطاطري مهنه يتمرن عليها اصل العجين هو الي لازم يتقنه. ضريته اكتر ما عملت له هايعيش كده لاعارف فطير ولا قادر ياكلة او يتعلمة

27/11/2013