قريبا سنقف جميعا علي اعتاب لجان الانتخابات المزعومة لاقرار الدستور المنتظر وحتي الان تبدو الصورة مهزوزة امام البعض ، فقطيع يرفض جملة وتفصيلا دستور لم يقرأة بعد لاسباب عدة تحت مسمي الحريات , وقطيع اخر يرفض الدستور لانه مؤيد للشرعية ولا يعترف بالحكومة ..... ابو تريكة مثلا......وقطيع آخر يسعي لتوقيف الوقت حتي لا نصل من البداية لاي من تلك النهايات الاسطورية في وضع دستور وصناعة ديموقراطية .
إنسي الكلام اللي فوق خالص لأن مش ده أصل الحوار
بالأمس قرات المعلقة الاستراتيجية في بحث منهج الاخوة مؤيدي الشرعية والتي تحدثت دونما يدع مجال للشك في موضوع بالغ الاهمية وهو التتبيلة السحرية للمصالحة الوطنية ....وياللعجب قرأت ما قرأت ....واعدت وجوّدت علشان افهم المقادير الاصلية للخلطة اللوزعية .... تهرب مني الفهامة واذهب في دوامة ....وبعد هذا وذاك وصلنا الحمد لله الي اصل التراك ....ايه الحكاية يا سيدي الفاضل نقول من هنا ونسمع اللي جنبنا ....
فجاة اكتشف الاخوة الافاضل بتوع تحالف دعم الشرعية ان البلد دي فيها شعب مالوش في المهلبية وقال مش واكل....ففكروا يغيروا المنيو ويجددوا المطبخ قالك نسعي لوحدة مصر وشعبها ...انا استغربت هو شعبها ده اللي بيقولوا عليهم خوارج ... اه والله يا خال خوارج وبيكتبوها كده في الهاش تاج علي تويتر اللعين #انقلاب_الخوارج ... قلت اكمل واعديها بلاد تشيلني وبلاد تحطني المهم يا سيدي قالك ضوابط الخروج من الازمة ...قلت وماله حد يكرة الخير قالك عودة الشرعية والمسار الديموقراطي وراح راشش وراها رشة حوار وطني مع حفنة حريات للقنوات وكوبايتين حقوق الشهدا وقالك الحوار الجاد ...وهوب دخل الصينية الفرن يا سيدي
الطبخة ناقصة شوية ملح ؟ لا مش ناقصة ...فكر تاني ... الي قاعد يمين المطبخ هايحس الطبخه ناقصة شوية مرسي علي حبة عريان ورشفة بلتاجيز ...واللي قاعد علي شمال المطبخ هايشوف الطبخة مستوية ومقرمشة وجاهزة للاكل ملحها مظبوط وتتمصمص ...ياااه فين ايام الشعب الغير قابل للامتصاص
اصبح الكل علي استعداد انه يشارك الترابيزة مع الباقين هو كل الموضوع ان لما باظ المشروع الكل قعد مفزوع احسن يفوت الوقت ومايلاقيش علي الترابيزة مكان ياكل فيه البعيد ويفت....اما عن الشيف القديم فميشغلناش بقي ده يروح يسترزق بعيد ممكن يشتغل رئيس حي مدينة البط كما اثبت لنا طموحة مؤخر.
في المطبخ الي جنبه كان في مساعد شيف بيشرف علي طبق الحلو اللي مطلوب علشان العزومة تخلص والكل مرحب وحبوب جالك عز الدين شقير قدم الخير و مقرر لجنة حماية المسار الديمقراطي بمجلس الوزراء وقالك مرسي يتنحي وبديع يسرحها ويفضل الحلوين اللي عن العنف مش راضيين في المطبخ معانا يطبخوا نفس الطبيخ وبالكريم شانتية يحلو ونختم العزومة بعصير البطيخ.
ايوه ايه المحصلة من حصة الطبيخ المذكورة اعلاة ..
يا صديقي العزيز القارئ ان كنت جعان او شبعان او مش فارق ....الحكاية من اولكشي طبيخ في طبيخ كل واحد عاوز يعوم في الصحون وياكل اكل شعب مصر الغلبان المطحون ...كل حوت منهم جعان الي عاوز بط والي غاوي سمك مرجان ...يفضل مواطن بيشقي علي رزقه جعان
والخلاصة يا سيدي ان في كل زمان ومكان كل الحكاية عندهم كراسي البرلمان.
بالهنا والشفا
No comments:
Post a Comment